T’i paguash 2 mijë euro një kamerieri për t’u hedhur në det me gjithë motor mund të duket gallatë dhe është një nga bëmat e radhës të Mario Balotelit. Por këtë radhë sulmuesi italian nuk e ka menduar edhe aq mirë atë që ka bërë, pasi ngjarja është nën hetim nga policia dhe për të do të hapet shpejt çështje penale.
Video e kamerierit që hidhej në ujë në një port në Napoli, e shpërndarë edhe nga vetë Baloteli, ka bërë xhiron në rrjetet sociale. Por sigurisht që të hedhësh një motor në ujëra publik është ndotje e ambientit, kundravajtje penale, e kjo video provon saktësisht që një veprim i tillë është kryer me urdhër të sulmuesit italian i cili ka “nxitur” një person tjetër ta bëjë një gjë të tillë.
Sipas mediave italiane, policia ka grumbulluar videot e shpërndara në rrjete sociale nga lojtari por edhe persona të tjerë që po e ndiqnin atë moment e së shpejti do të depozitojë ankesën në prokurorinë e Napolit për të hapur çështje penale. Ajo do të jetë ndaj Balotelit, që nuk i shmanget një gjobe, ashtu si edhe ndaj kamerierit i cili rrezikon t’ia kalojë shtetit ato 2 mijë euro që fitoi se hodhi në det motorin e tij.
