Mëngjesin e së dielës do të zhvillohet në Las Vegas dueli i peshës “welter” (pesha 63-67kg) në boks mes dy kampionëve, filipinasit Manny Pacquiao dhe amerikanit Keith Thurman. Një sfidë që pritet me interes dhe parashikohet e fortë. Dy boksierët kanë kryer sot peshimet zyrtare dhe gjithçka ka shkuar mbarë, ndaj tani fjalën e fundit e ka ringu.
Thurman, 29 fitore e asnjë humbje në karrierë, ka kërcënuar rivalin filipinas. “Edhe pas kësaj sfide unë do të jem i pamposhtur. Manny do ta ndjejë që në raundin e parë fuqinë time dhe do ta kuptoj se përse nuk kam asnjë humbje. Do ta godas fort në trup. Është më i shkurtër se unë dhe do ta përdor gjithë avantazhin për ta goditur fort”, tha Thurman.
“Është 40 vjeç dhe do ta ndjejë peshën e një rivali më të ri. Objektivi im është që ta shkatërroj në ring, ta fitojë duelin me KO. E kam studiuar mirë dhe kam vërejtur se ai ka shumë të meta në mënyrën se si bokson, të cilat do t’i shfrytëzoj”, u shpreh Thurman.
