Skuadra e Feronikelit humbi 0-1 nga uellsianët e The New Saints (TNS) dhe rrjedhimisht u skualifikua nga turi i parë eliminator i Ligës së Kampionëve. Ishte një skualifikim dramatik që lë një shijë te hidhur, pasi kampionët e Kosovës, me një barazim pa gola mund të kalonin në fazën tjetër.
Zekerija Ramadani, pas ndeshjes foli për “RTK” dhe shprehu keqardhjen e tij për këtë eliminim.
“Më vjen keq për futbollistët që dhanë maksimumin dhe nuk arritën të kalonin në fazën tjetër. Nuk jemi ekipi i parë që dënohemi kështu. Shpërdoruam shumë raste. E dinim që përballë kishim një kundërshtar shumë cinik. Faktikisht mendoj se ata luajtën më dobët se ndeshjen e fundit. Mendoj që skuadra dha maksimumin dhe ndoshta kaq është maksimumi i skuadrës. Nuk e turpëruam, futbollin kosovar dhe nuk turpërua Feronikeli. Nga humbje të tilla mund të mësosh”, është shprehur Ramadani.
Ndërkaq për rastin e penalltisë ai ka shtuar: “Unë nga fusha nuk e dallova, por tani nga pamjet filmike dallohet që arbitri ka gabuar. Gjithsesi asgjë nuk ka mbaruar. Duhet ta lëmë pas atmosferën që sjell humbja”.