Superkupa e Europës është finalja që luhet prej fituesit të edicionit të fundit në Champions, Liverpulit dhe atij të Ligës së Europës, Çelsi. Kjo është ajo që duhet të dini për finalen e këtij sezoni.
Ku luhet?
Në “Vodafone Park”, stadiumi i Beshiktashit në Stamboll. Kjo është hera e parë që kjo finale do të luhet në Turqi. Stambolli mposhti qytetet e Tiranës (Shqipëri), Tuluzës (Francë), Haifas (Izrael), Astanës (Kazakistan), Belfastit (Irlandë e Veriut) dhe Gdanskut (Poloni).
Kur luhet?
Edicioni i 44-t i Superkupës së Europës nis sot në orën 21:00.
Cila skuadër angleze e ka fituar për herë të fundit?
Liverpuli, në vitin 2005.
A do të ketë VAR?
Po, dhe kjo ndeshje do të hyjë në histori si finalja e parë e Superkupës që do të përdorë Arbitrin Video Asistent.
Sa tifozë do të ketë?
“Vodafone Park”, i cili është një stadium i gjithi me ndenjëse për t’u ulur, ka një kapacitet prej 41 mijë vendesh. Tifozët e Liverpulit do të bëjnë më shumë zhurmë, sepse janë katër herë më të shumtë në numër. Ata kanë blerë 5.973 bileta ndaj 1.314 të Çelsit.
