“Është shumë e vështirë të rihapim botërorin e Formula 1. Kjo vlen edhe për mua. Që të ndodhë kjo gjë, duhet që Hamilton të jetë piloti më i pafat në botë në pjesën e dytë të sezonit”, u shpreh Max Verstappen për “Telegraaf”.
Piloti holandez i Red Bull shprehet se ka hequr dorë nga titulli kampion këtë vit. Ai konfirmon se makina austriake ka nisur që tani nga puna për 2020-ën. “Po punojmë që të ngushtojmë diferencat me Mercedes, ndërkohë që sinjalet e marra janë pozitive. Me motorin Honda kemi mundësi ende të përmirësohemi. Unë dua të fitoj, nuk më intereson të dal i dyti”, tha Verstappen.
Gara e radhës së botërorit të Formula 1 është në Belgjikë. “SPA është pista ime e preferuar, është gjithnjë një kënaqësi kur pilotoj aty. Këtë herë, tifozët e mi do të kenë një tribunë speciale, që do ta ngjyrosin me portokalli”, tha Verstappen.
