Elton Kale ishte një ndër futbollistët më të dalluar të Tiranës, në triumfin e sotëm ndaj Vllaznisë. Në prononcimin pas ndeshjes, braziliani u shpreh i lumtur për fitoren, teksa shpreson që bardheblutë të kthehen në majën e futbollit shqiptar. Kale komentoi gjithashtu edhe rastet e humbura si dhe sjelljen e tifozëve shkodranë.
“Jam thjesht një lojtar i skuadrës. Jam në gjendje të mirë dhe jam i gatshëm për të ndihmuar skuadrën duke dhënë maksimumin. Është përgjegjësi e madhe për ne. Organika e Tiranës është më e plotë. Kemi më shumë cilësi. Duhet t’i marrim ndeshjet një nga një. Synimi është që Tirana të rikthehet aty ku i takon. Është një klub i madh, po kthehen dhe tifozët.
Rastet e humbura…
Është e vërtetë, kisha një rast në pjesën e parë, për të cilin bisedova edhe me trajnerin. Trajneri më kërkoi llogari, duhet të kisha shënuar. Është normale, jemi lojtarë me kualitet dhe për këtë gjë paguhemi.
Sjellja e tifozëve të Vllaznisë…
Kam luajtur edhe në Greqi për OFI-n, por kjo nuk ishte diçka e mirë. Për mendimin tim nuk është diçka e mirë për Vllazninë dhe Shqipërinë. Ky nuk është imazh i mirë në asnjë stadium që hidhen shishe në fushë. Është vetëm një çështje imazhi”