Italia ka fituar ndeshjen e pestë të kualifikueseve të Euro 2020 dhe të nëntën radhazi në të gjithë kompeticionet. Ecuri me rekord vazhdon, pasi asnjëherë tjetër Azzurri-t nuk kishin fituar kaq shumë ndeshje radhazi.
Këtë herë viktima ishte Armenia, e cila është mposhtur brenda me rezultatin 3-1.
Italia e nisi më mirë se vendasit, por një gabim në mesfushë nga Barela i dha mundësinë armenëve të bënin një kundërsulm të shpejtë i cili finalizohet me shumë klas nga Karapetian.
Sulmuesi ka kryer një goditje fantastike duke befasuar Bonucci-n dhe portierin Donnarumma. Megjithatë, Andrea Belotti rikthen barazimin me golin e tij në minutën e 28’ të takimit.
Autori i golit të parë për vendasit ka marrë kartonin e dytë të verdhë në kohën shtesë të pjesës së parë. Përsëritjet treguan qartë se Bonucci ka simuluar duke bërë sikur kundërshtari e kishte goditur në fytyrë me bërryl, por nuk ishte ashtu.
Pas pushimit, armenët u munduan me të gjitha forcat të ruanin pikën, por dy golat e shpejtë në të 77’ dhe 80’ i kanë dhënë fitoren e radhës italianëve. Golat janë shënuar nga Pellegrini dhe Belotti.
