Cili është stadiumi më i mirë në Europë për t’u vizituar nga tifozët e futbollit? Për t’iu përgjigjur kësaj pyetje, sajti “Footy.com” është argëtuar duke bërë një klasifikim. Studimi ka analizuar impiantet në një ditë kur mirëpresin një ndeshje futbolli duke marrë në shqyrtim shtatë faktorë: çmimet e abonimeve për sezonin 2019/2020, standardet mjedisore, çmimet e birrës, teknologjia në dispozicion, funksionshmëria, transportet dhe në fund kapaciteti i stadiumit.
Rezultati i kërkimit thotë se “Etihad Stadium”, shtëpia e Mançester Sitit është i pari në Europë me 70 pikë, duke lënë pas shpine “Camp Nou” të Barcelonës me 63 pikë dhe “Allianz Arena” të Bajern Mynihut me 54 pikë. Më pas vijnë me radhë “Estadio Da Luz” i Benfikës me 53 pikë, “Gazprom Arena” i Zenitit me 53 pikë, “Red Bull Arena” i Salcburgut me 51 pikë, “Parc de Princes” i Paris Sën Zhërmenit me 48 pikë, “Allianz Stadium” i Juventusit me 44 pikë, “Turk Telekom Arena” i Gallatasarajit me 43 pikë dhe mbyll renditjen “Luminus Arena” i Genkut me 42 pikë, një xhevahir i vërtetë me 25 mijë vende.
