Drejtori sportiv i Ferrarit, Mattia Binotto, gjendet në mes të dy zjarreve: Të mbajë e Charles Leclerc, që është e ardhmja e “kokëkuqes”, apo të Sebastian Vettel, një ikone të këtij sporti. Duket qartë që te makina italiane situata është e tensionuar dhe askush nga pilotët nuk dëshiron të hapë krahun.
Komunikimet në radio në garën e fundit në Sochi konfirmuan klimën e tensionuar mes dy pilotëve dhe drejtuesve të pafuqishëm të ndërhyjnë. “Duhet të lësh Charles të parakalojë”, ishte urdhëri që drejtuesit i thanë Vettel, që replikoi: “Nëse afrohet ia hap unë krahun”.
Charles ishte 4 sekonda pas dhe parakalimi ndodhi vetëm në bokse, por më pas situata shkoi për ters për makinën italiane.
Gjithsesi, komunikimet e shpeshta në radio gjatë garës tregojnë se situata është po aq e tensionuar si dikur mes Hamilton dhe Rosberg te Mercedes. Nëse atëherë dy pilotët duelonin për titull, këtë herë dy pilotët duan të tregojnë se kush është më i forti.
