Dortmundi do të luajë ditën e sotme në transfertë përballë Interit, në ndeshjen e vlefshme për fazën e grupeve në Ligën e Kampionëve.
Verdhezinjtë kanë pasur disa probleme në këtë fillim sezoni, dhe nuk janë në gjendjen më të mirë të mundshme për këtë sfidë. Pikërisht këto probleme që gjermanët kanë shfaqur në disa ndeshje, nuk i kanë pëlqyer aspak drejtuesve të klubit.
Sipas asaj që shkruan “Bild”, Dortmundi nuk është i kënaqur me punën e bërë nga trajneri Lusien Favre, dhe po mendojnë për ta shkarkuar atë. Emri i parë në listën e verdhezinjve për të zëvendësuar teknikun zviceran, është Zhoze Murinjo, i cili aktualisht është i papunë.
Thuhet se gjermanët do të presin edhe ndeshjet e ardhshme, dhe në rast se nuk binden me performancat e ekipit, atëherë ai që do ta pësojë do të jetë pikërisht trajneri.
