Janë plot pesë lojtarë të Kombëtares që rrezikojnë sfidën e luksit me Francën më 17 nëntor, e cila do të zhvillohet në stadiumin e ri në kryeqytet, që për dekada me radhë ka mbajtur emrin “Qemal Stafa”.
Sokol Cikalleshi, Keidi Bare, Kastriot Dermaku, Amri Abrashi dhe Taulant Xhaka, nëse ndëshkohen me kartonë të verdhë në sfidën e 14 nëntorit me Andorrën, humbasin kësisoj takimin me Francën. Sipas rregullores së UEFA-s, një lojtar pezullohet për ndeshjen tjetër pas tre kartonëve në tri ndeshje të ndryshme.
Me Andorrën trajneri Reja duhet të bëjë llogaritë vetëm pa mesfushorin Klaus Gjasula, i cili me kartonin që mori ndaj Moldavisë, plotësoi numrin tre të tyre. Gjatë këtij edicioni asnjë lojtar nuk është ndëshkuar me të kuq.
