Trajneri i Partizanit Franko Lerda është përplasur ditën e djeshme fizikisht me ndihmësin e tij, Dritan Mehmeti. Situata ka precipituar deri në konfrontim fizik, aq sa më pas është dashur ndërhyrja e personave të tjera për t’i ndarë.
Kjo nuk është hera e parë që italiani bëhet protagonist me zënkat e tij. Përplasjet e Lerdës me pjesëtarë të stafit dhe me lojtarët kanë nisur që gjatë fazës përgatitore në Slloveni. Aty ai ka pasur një përplasje me menaxherin e klubit, kryesisht për aspektin menaxherial të stërvitjes dhe për të mos agravuar situatën, ky i fundit është tërhequr nga faza dhe ka ardhur në Shqipëri.
Ndërkohë faktet tregojnë se Lerda është një “sherrxhi i vjetër”, pasi edhe në kohën që ka drejtuar në futbollin italian, nuk kanë munguar përplasjet.
5 vite më parë, kur Lerda drejtonte Leçen gjatë sezonit 2013-2014 në një finale “Play-Off”-i, e humbur nga skuadra e tij me Frosinonen (1-3), trajneri aktual i Partizanit do të gjuante me grushte zyrtarin e Frosinones, ndërsa më pas do të përplasej me një tifoz që festonte në fushën e blertë si dhe me një prej futbollistëve të skuadrës kundërshtare. Atëherë Komisioni i Disiplinës në Itali e përjashtoi Lerdën me 7 muaj.
