Elseid Hysaj do të ishte pjesë e La Ligas spanjolle që nga shtatori. Kjo deklaratë është bërë dje në mediat italiane, teksa për emrin e mbrojtësit të Kombëtares po flitet shumë, sidomos edhe pas dëmtimit të rëndë që ka pësuar Malkuit, mbrojtësi i djathtë që i mori fanellën e titullarit.
Antonio Xhordano, gazetari i “Corriere Dello Sport”, ka bërë me dije edhe prapaskenën e merkatos së transferimeve. Sipas tij, Hysaj do të kishte disa muaj me një tjetër fanellë në ditët e sotme, por një gjë e tillë nuk u la që të finalizohej nga numri një i klubit napolitan.
“Hysaj ishte i Valencias. Diçka e tillë u vendos ditën e fundit të merkatos së transferimeve. Mirëpo, në momentin kur pritej vetëm ‘vula zyrtare’ për të finalizuar transferimin, ishte Aurelio De Laurentis që bllokoi gjithçka duke e mbajtur shqiptarin sërish në Napoli”, ka zbuluar gazetari italian referuar mundësisë që mbrojtësi i Kombëtares ka pasur për të ndryshuar ambient për sezonin aktual.
Së fundmi, dëmtimi i Malkuit dhe situata e dëmtimeve me mbrojtësit anësorë mund t’i detyrojë napolitanët që të bllokojnë shitjet e lojtarëve gjatë merkatos së dimrit.
