Daniele Rugani është një tjetër rast “alla Manxukiç” në radhët e Juventusit. Nëse për sulmuesin kroat trajneri Mauricio Sarri ishte treguar konkret që kur zbarkoi, se ai nuk bënte më pjesë në planet e tij dhe e ftuan të gjente një sistemim tjetër, për mbrojtësin italian ndodhi krejt e kundërta.
Edhe pse Rugani kishte kërkesa në verë nga Arsenali, Roma, apo edhe Barcelona, që e donte si zëvendësues të Umtitit e Lenglesë, 25-vjeçari refuzoi të gjitha ofertat. Shpresat e lojtarit se me trajnerin Sarri, me të cilin ishte titullar absolut në dy sezonet tek Empoli (2013-2015), do të kishte më shumë minuta se me Alegrin, janë hedhur totalisht në erë.
Sarri jo vetëm që nuk e ka aktivizuar, por e ka harruar totalisht se Rugani është pjesë e Juves, duke qenë se në 9 ndeshjet e para sezonale ai nuk ka luajtur asnjë sekondë. Dhe situata nuk pritet që të ndryshojë as në vazhdim, duke parë konkurrencën e Merih Demiralit dhe Matajs De Ligtit (aq më shumë në pritje të rikuperimit të kapitenit Xhorxho Kielini), prandaj në merkaton e janarit duket i padiskutueshëm largimi nga Torino.
