Fantazia e një artisti mund të arrijë të prodhojë shpikje nga më të çuditshmet.
Këtë herë Në Barcelonë, një artist grafiti ka befasuar të gjithë publikun botëror duke vizatuar Zherard Pikenë dhe Serxho Ramosin duke u puthur me njëri-tjetrin. Bashkangjitur vizatimit, ai ka shkruar “Spanjë, puthu dhe dialogo”.
Personi në fjalë, i njohur me nofkën, “Tvboy” synon të transmetojë mesazhin që madrilenët dhe katalanasit të jetojnë në harmoni dhe të negociojnë çdo problem midis tyre dhe jo të zgjedhin rrugët konfliktuale dhe të përplasjeve të vazhdueshme. Grafiti është kryer në zonën e Paseo de Gracias.
Nuk është hera e parë që “Tvboy” bën grafite provokuese. Më parë, ai ka bërë grafit mes Hoze Murinjos dhe Pep Guardiolës duke u puthur me njëri-tjetrin si dhe Kristiano Ronaldon i veshur me mbathje me ngjyrat e ylberit.
Në kohën kur Spanja po kalon probleme të mëdha të brendshme me palën katalanase, Real Madrid dhe Barcelona do të përballen ditën e nesërme “El Klasiko” për herë të parë në këtë sezon. Për mbarëvajtjen e sigurisë dhe takimit në “Kamp Nou”, autoritetet spanjolle do të dislokojnë rreth 3000 forca policie.
