Emri i trajnerit Edy Reja është përmendur së fundmi në Itali si zëvendësuesi i Carlo Anchelotti-t te Napoli, skuadra e cila prej tetë ndeshjesh nuk njeh fitore në ‘Seria A’. Ka qenë vetë 74-vjeçari që në një intervistë për mediat italiane ka hedhur poshtë këtë mundësi, por gjithsesi dyshimet kanë mbetur sërish, deri ditën e sotme kur italiani ka qenë në Shqipëri.
Reja ka organizuar në Tiranë një mbledhje me të gjithë trajnerët e ekipeve të moshave që drejtojnë kuqezinjtë, ndërsa për mediat pas kësaj mbledhje ka dhënë siguri se do të vijojë të jetë trajneri i Shqipërisë.
Prej 20 nëntorit kombëtarja është zyrtarisht pa trajner, pasi Reja-s i përfundoi kontrata. Gjithsesi duke iu referuar deklaratave por edhe burimeve brenda pak ditësh italiani pritet të firmosë për katër vitet e ardhshme me kuqezinjtë.
