Futbollisti i Real Madridit Fede Valverde humbet sfidën kundër Sevijas që luhet këtë të shtunë.
Komiteti i Garës në Federatën Spanjolle të Futbollit përjashtoi për 1 takim mesfushorin uruguajan të madrilenëve për kartonin e kuq që mori në finalen e Superkupës së Spanjës kundër Atletiko Madridit, ku i ndërhyri nga pas sulmuesit Alvaro Morata.
21-vjeçari i hoqi mundësinë e artë bardhekuqve për të shënuar. Komisioni i Garës u bazua në raportin e arbitrit të finales Sançez Martinez.
Edhe pse u ndëshkua me karton të kuq për ndërhyrjen e kryer ndaj Moratës, Valverde u shpall “Lojtari i ndeshjes” Real Madrid-Atletiko Madrid, ku skuadra e Zidan fitoi nga raundi i penalltive 4-1. Për sakrificën e bërë në emër të ekipit, Valverde u shpall nga madrilenët si hero i tyre.
