Një ekip ka 11 lojtarë, por Verona ka dy me gjak shqiptar që bëjnë diferencën. Njëri do të shkojë te Napoli, ndërsa tjetri me shumë gjasa do të largohet. Bëhet fjalë për Marash Kumbullën e Amir Rrahmanin. Dyshja e Veronës dje ngriti një tjetër mur, ku u përplasën me radhë sulmuesit e Milanit. Vlerësimet për secilin kanë qenë të larta, me shkodranin që mori më shumë elozhe pas barazimit të djeshëm.
KUMBULLA – “San Siro” nuk është një stadium për këdo, por Marash Kumbulla vërtetoi se nuk i mungon as talenti, e aq më pak karakteri, teksa notat e tij në mediat e ndryshme ishin si më poshtë:
“Eurosport” 7 – Shumëfishon rrezen e aksionit dhe e gjen në çdo cep të fushës. Vendimtar kur përplas në shtyllë goditjen e Kastijehos në fund të takimit.
“Sportmediaset” 7 – Gjigant në çdo dyluftim me sulmuesit e “Djallit”. Kur Verona mbetet me një lojtar më pak, vendos të ndihmojë edhe në fazën sulmuese të ekipit. I kudondodhur.
“Tuttomercatoweb” 6,5 – Elegant dhe i saktë. Ka talent dhe personalitet. Do të ishte interesante ta shikonim atë në përballje me gjigantin Ibrahimoviç.
RRAHMANI – Edhe pse u ndëshkua me karton, nuk kaloi pa u vënë re as paraqitja e Amir Rrahmanit. Elozhet nuk munguan as për mbrojtësin që në fund të sezonit do të kalojë te Napoli.
“Corriere dello Sport” 6 – Rebiç e bën me dhimbje koke derisa ndëshkohet. Pikërisht pas kartonit kosovari ngre nivelin dhe bllokon këdo që i vrapon pranë me fanellë kuqezi.
“Tuttomercatoweb” 6,5 – Së bashku me shokët e repartit ofron një paraqitje dinjitoze. I saktë, në tokë e në ajër.
“Eurosport” 6 – Duelet me sulmuesit kuqezinj nuk e stepin. Jep e merr shkelma, por në fund është vendimtar në mbajtjen lart të prapavijës.
