Valentino Rossi ka folur për herë të parë sot pas përfundimit të testeve të para dimërore në Moto GP, të zhvilluara në pistën e Losail, në Katar. Në këto teste, piloti italian i Yamaha u klasifikua në vendin e 12-të.
“Problemi nuk është vendi ku u klasifikova në këto teste, por ritmi që ka motori. Pas disa xhirosh u detyrova të ul shpejtësinë, pasi rendimenti i gomave u ul ndjeshëm. U shfaq i njëjti problem si një vit më parë dhe kjo gjë më shqetëson”, tha Rossi.
“Pilotët e tjerë të Yamaha, asaj zyrtare dhe jo-zyrtare, ishin më të shpejtë se unë, madje mbi të gjitha më konstantë, ndaj duhet të punojmë në këtë drejtim. Kam nevojë që motori të përmirësohet më shumë”, tha Rossi.
