Kukësi ka mundur pastër dhe thellë me rezultatin 1-4 Flamurtarin në transfertë dhe nuk ka lëshuar as këtë javë kreun e Kategorisë Superiore.
Ekipi i Shpëtim Duros u fut me shumë vrull në fushë, duke e gjetur veten në avantazhin e dy golave që prej minutës së 12-të. Shkurtaj me dopietën e tij, vendosi baza të forta për fitoren. Pjesa e parë pati raste të tjera, por gola jo.
Ndërkaq në të dytën, Flamurtari u “zgjua” duke gjetur golin me Vrapin, në minutën e 59-të. Kukësi reagoi menjëherë dhe shënoi të tretin në minutën e 69-të me anë të kapitenit Musolli. Fjalën e fundit të kësaj ndeshje, e tha Marko Van Basten Çema, që brenda zonës shënoi të katërtin dhe të parin personal në Superiore.
Kështu Kukësi me këtë trepikësh ka shkuar në kuotën e 38 pikëve duke mbajtur vendin e parë. Ndërsa për Flamurtarin nuk ka shpëtim, pasi mbetet në kuotën e 6 pikëve, në vendin e fundit.
