Në prag të ndeshjes ndaj Genoas, që u luajt me dyer të mbyllura, Ivan Gazidis, administratori i deleguar i Milanit, foli me ekipin kuqezi, pra stafin teknik dhe futbollistët, ndërsa kishte ndodhur shkarkimi i Bobanit, por edhe ftohja me Maldini dhe Massara.
“Gazzetta dello Sport” zbulon edhe një pjesë të diskutimit që administratori i deleguar, njeriu i besuar i Elliott, ka thënë në konceptet që ka shprehur. Gazidis konfirmoi largimin e Bobanit nga projekti kuqezi, ndërsa ka kërkuar që ekipi të fokusohet në fushë dhe jo në çështjet e drejtuesve, pasi Milani dhe tifozët e saj vijnë përpara çdo gjëje.
Madje, ka përgënjeshtruar deklaratat e kroatit, duke u shprehur se asgjë nuk ka ndodhur në padijeninë e drejtuesve dhe nuk do të ketë asnjë revolucion. Objektivi është të investohet dhe të rritet skuadra.
Ndërkohë, i ka konfirmuar trajnerit Pioli besim të plotë duke e përgëzuar edhe për punën e tij, përpara futbollistëve. Një gjest që është çmuar nga trajneri.