Sipas “Gazzetta dello Sport”, Zlatan Ibrahimovic mund të tërhiqet në fund të sezonit. Ajo që dukej si një shtyllë në rindërtimin e Milanit, e vendosur nga Boban dhe Maldini, tani po mendon seriozisht pensionimin në fund të sezonit. Pandemia globale do të ishte, gjithashtu, në qendër të kësaj çështje. “Coronavirus” ka ndryshuar edhe kartat në tryezën dhe mendjen e suedezit, i cili në janar nënshkroi vetëm për 6 muaj me kuqezinjtë, me opsionin për ta zgjatur kontratën edhe sezonin e ardhshëm.
Në moshën 39-vjeçare (tetorin e ardhshëm), me Milanin pa marrë ende një vendim për të (dhe lamtumirën e Boban), hipoteza e bën gjithnjë e më të komplikuar të ardhmen. Ideja e tërheqjes nga futbolli tashmë ekzistonte tek ai, edhe gjatë negociatave me Milanin, përpara se të bindej. Sidoqoftë, kontributi i tij do të jetë vendimtar te kuqezinjtë, për ta përmbyllur sezonin me kualifikim në Kupa e Europës. E ardhmja e pasigurt e Milanit mund të jetë vendimtare në vendimin e Ibrës.
