Eros Grezda është rikthyer në Kroaci, por nuk ka gjetur ende golin e tij të parë. Mesfushori me tipare ofensive e ka gjetur dje rrugën e rrjetës, por një ndërhyrje e sistemit të teknologjisë arbitrare VAR, ia ka mohuar atë.
Në fitoren 2-0 që Osijek arriti përballë skuadrës së Varazdin, shqiptari nisi ndeshjen që nga minuta e parë. I përhershëm në formacionin titullar, por mesfushori kuqezi ishte i pafat në disa raste shënimi. Futbollisti doli disa herë në mundësi shënimi, por portieri i ekipit kundërshtar bëri disa herë mrekullinë, shpesh edhe me fat për të ndalur Grezdën.
Në minutën e 45-të, Osijek fiton një penallti me anë të sistemit VAR. Mariç gjuan dhe pasi sfera përplaset në shtyllë, është Grezda që e shtyn drejt rrjetës. Mirëpo, VAR ndërhyn sërish dhe e anulon, duke qenë se shqiptari ishte nisur para se të ekzekutohej penalltia.
