Ronald Koeman thotë se hodhi poshtë mundësinë për të drejtuar Barcelonën për shkak të angazhimit me kombëtaren e tij. Hollandezi, i cili kaloi gjashtë sezone me katalanasit si futbollist, pretendon se iu ofrua posti në fjalë, pas shkarkimit të Ernesto Valverde, këtë sezon.
Përfundimisht, pasi u refuzua edhe nga Xavi Hernandez, Barça vendosi të emërojë Quique Setien si trajner. I pyetur nga reporterët, nëse iu afrua drejtimi i gjigantëve katalanas, Koeman u përgjigj: “Po. Unë thashë ‘jo’, sepse jam me ekipin kombëtar”.
Ai, gjithashtu, foli për mesfushorin e Barçës dhe Hollandës, Frenkie de Jong, i cili ka pasur një sezon jo fort pozitiv në vitin e tij të parë në La Liga: “De Jong po luan shumë te Barça dhe kjo është pozitive. Sidoqoftë, ai po luan në një pozicion tjetër nga sa është mësuar. Ky është vendimi i trajnerit atje. De Jong është shumë i ri dhe nga të luajturit shumë ndeshje do të mësojë gjëra të reja. Me mua luan ndryshe në ekipin kombëtar”.
