La Liga e ka marrë seriozisht çështjen e koronavirusit dhe ka urdhëruar 42 ekipet profesioniste (Liga e parë dhe e dytë) që të kryejnë analizat për të gjithë futbollistët e tyre. Presidenti Havier Tebas ua ka komunikuar skuadrave këtë vendim dhe ato duhet ta zbatojnë patjetër.
Në këtë mënyrë lojtarët e Kombëtares shqiptare, Rei Manaj (Barcelona e ka bërë testin më parë), Armando Sadiku dhe Keidi Bare (Malaga) duhet të bëjnë tamponin për të parë nëse janë prekur nga koronavirusi. Në fakt disa skuadra e kishin marrë vetë këtë vendim, ndërsa të tjera janë mjaftuar vetëm me karantinimin e futbollistëve.
Rezultatet do të dalin gjatë kësaj jave dhe ekziston rreziku qe numri i lojtarëve të prekur të rritet ndjeshëm. Valencia me 35% të skuadrës pozitive është ajo që shqetëson më shumë në këto momente. Nga ana tjetër Tebas është i bindur se sezoni futbollistik do të luhet deri në fund dhe La Liga nuk ka ndërmend të marrë masa ekstreme për anulimin apo pezullimin përfundimtar.