FIFA, përmes fuqisë së futbollit, është vënë në ballë të luftës kundër “Coronavirus”. Kuptohet, jo si institucion mjekësor, por përmes mesazheve për të ndjekur e zbatuar me përpikëri udhëzimet e OBSH. Në funksion të kësaj, qeveria e futbollit botëror ka nisur një fushatë ndërgjegjësimi, të udhëhequr nga gjashtë trajnerë të njohur botëror. Ata kërkojnë nga të gjithë, në mbarë globin, që të ndjekin pesë “takika kyçe” për të prarandaluar përhapjen e virusit.
Arsene Wenger, Mauricio Pochettino, Casey Stoney, Aliou Cisse, José Mourinho dhe Jill Ellis janë bashkuar në një “ndeshje” me pesë faza (duart, bërryli, fytyra, distanca dhe ndjeshmëria) për të mposhtur “Coronavirus”. Ata duken në një video të përbashkët, teksa japin këshilla për mënyrën se si duhet të sillemi, që të mos infektohemi nga virusi.
Gjthçka bazohet në masat mbrojtëse, të njoftuara nga OBSH kundër Covid-19. Kjo nismë shkon në atë drejtim me letrën e sotme të presidentit Gianni Infantino, i cili jepte kushtrimin: Ta mposhtim “Coronavirus” përmes fuqisë së futbollit!
FIFA and WHO launch five key tactics to tackle coronavirus: https://t.co/CEqrrjXEAC pic.twitter.com/xitn2x1SJS
— FIFA Media (@fifamedia) March 16, 2020
