Mario Balotelin e kërkonin shumë skuadra në merkaton e verës së kaluar, por në fund ai vendosi të kalojë te skuadra italiane e Breshas. Megjithatë aventura e italianit te këta të fundit, nuk ka shkuar në mënyrën më të mirë të mundshme.
Në merkaton e ardhshme, Baloteli pritet të ndryshojë skuadër për të vazhduar karrierën diku tjetër, teksa këtë e konfirmon vetë presidenti i Breshas. Masimo Çelino në një intervistë të dhënë së fundmi, është shprehur se gabuan me afrimin e sulmuesit, duke shtuar se atij nuk i pëlqen të qëndrojë në Itali.
“Ne kemi bërë një gabim me Balotelin. Unë mendoja se duke e sjellë Balotelin në qytetin e tij, do e shtynim atë të bënte më shumë përpjekje për të arritur formën e dikurshme. Mendoj se ai është menaxhuar keq nga trajneri Korini.
Problemi është se Marios nuk i intereson e ardhmja në klubin tonë. Sulmuesi ka një kontratë me ne për në Serie A dhe jo në Serie B, kështu që nëse ne rrëzohemi, atëherë ai do të jetë lojtar i lirë. Mendimi im është se atij nuk i pëlqen të qëndrojë në Itali.”, u shpreh Çelino.
