Deklaratat e Kielinit kundër 2 ish-shokëve Mario Balotelit dhe Felipe Melos, së bashku me urrejtjen e shprehur hapur ndaj Interit shkaktuan shumë zhurmë në Italinë fqinje.
Të shumtë ishin ata që e kritikuan kapitenin e Juventusit për ato fjalë të cilat Xhorxho Kielini i ka përfshirë në librin autobiografik “Unë Xhorxho”.
Mirëpo, mbrojtësi italian ka ruajtur edhe fjalë të mira në librin e tij. Konkretisht, ai ka lavdëruar Diego Godin, për të cilin thotë se është një lider si Kielini dhe se jo rastësisht ndodhet te Interi.
“Më pëlqen t’i studioj kundërshtarët e mi, domethënë sulmuesit por edhe mbrojtësit, përfshirë këtu edhe mbrojtësin uruguajan Godin, që e solli Konte te Interi jo prej rastësisë.
Nëse do më pyesnin se cili lojtar e jeton profesionin dhe ndeshjet si unë, atëherë do i thoja Godin. Është i saktë si unë. Pra, nëse do të duhej të them emrin e një Kielini tjetër, unë do të thoja emrin e tij,” shkruan Kielini për Godin.
