Ish-trajneri i kombëtares franceze të futbollit Laurent Blanc do të jetë trajneri i ri i Barcelonës. Lajmin e konfirmoi sot e përditshmja franceze L’Equipe, sipas së cilës Blanc është favoriti dhe kandidati numër 1 për t’u ulur në stolin e klubit katalanas.
Blanc do të zërë vendin e trajnerit aktual Quique Setien, që pritet të shkarkohet që këtë javë nga Barcelona. Trajneri francez ka marrë “OK”-in e drejtorit teknik Eric Abidal, që është takuar me Jorge Mendes, menaxherin e trajnerit.
Mësohet se Blanc ka dhënë pëlqimin e tij për të firmosur një kontratë 1-vjeçare me skuadrën “blaugrana” dhe në rast se do të arrijë rezultate mund të qëndrojë edhe një vit tjetër.
