Ia kanë marrë dorën të gjithë tashmë. Milani anemik i fillimsezonit është histori e vjetër, ashtu si problemi në planin realizues. Me zbarkimin e Zlatan Ibrahimoviçit, skuadra ka gjetur disa siguri dhe gola. Me 20 gola të shënuar, kuqezinjtë janë sulmi i tretë më pjellor në Serinë A, teksa para tyre qëndrojnë Atalanta (24) dhe Sasuolo (21). Mjaftuan 7 ndeshje, megjithatë rritja e të besuarve të Piolit është e habitshme.
Deri para pandemisë, kuqezinjtë jo vetëm që nuk shënonin në pjesët e dyta, por shpesh edhe ndëshkoheshin. Ajo që shtang është ecuria sepse deri në ndalesën e Serisë A ekipi shënonte mesatarisht një gol për ndeshje, ndaj edhe u deshën 20 javë për 20 realizime. Pas pandemisë gjithçka ndryshoi dhe të njëjtit ekip iu deshën 7 javë për të njëjtën shifër realizimesh. Nga këta 20 gola të dytë, 16 kanë ardhur në fraksionet e dyta të ndeshjeve, teksa falë dhjetë prej tyre janë përmbysur rezultatet e sfidave me SPAL-in, Juventusin, Napolin dhe Parmën.
SHËNOJNË TË GJITHË — Me rritjen e numrit të realizimeve është rritur edhe ai i golashënuesve. Janë plot 9 kuqezinjtë që kanë mundur të shënojnë të paktën një herë që pas rinisjes së Serisë A dhe bëhet fjalë për Kastijehon, Kesin, Leaon, Bonaventurën, Ibrahimoviçin, Teo Hernandezin, Rebiçin, Çalhanoglunë dhe Romanjolin.
Edhe në këtë rast ka disa të dhëna vendimtare. Për të regjistruar 9 lojtarë në tabelën e golashënuesve Milanit iu desh edhe gjithë faza e parë teksa ajo ndaj Parmës ishte sfida e shtatë radhazi që kuqezinjtë shënonin dy gola. Kjo aktuale është ecuria më e mirë realizuese për kuqezinjtë që nga viti 2009 kur ndeshjet radhazi me nga dy gola të shënuar ishin tetë. Në dekadën e fundit asnjë trajner kuqezi nuk ka pasur një ecuri më të mirë, madje as Milani kampion Italie që në skuadër, përveç Ibrës, kishte edhe Paton apo Robinjon.