Monza ka ëndërra të mëdha, e shtyrë nga entuziasmi i tifozëve të saj. Në merkaton e kësaj vere janë regjistruar edhe “hitet” e para. Blerja e fundit është Carlos Augusto, mbrojtës i majtë, i marrë nga brazilianët e Corinthians. Synimi është ngjitja në Serie A, çka do të ishte diçka historike. Të shtunën e 5 shtatorit do të jetë koha për një ndeshje miqësore kundër Milanit në një “San Siro” të shkretë për arsye të dukshme; Covid-19.
Një derbi i vërtetë zemre për Adriano Galliani, i cili, i intervistuar nga “Gazzetta dello Sport”, tha: “Një emocion i shkëlqyeshëm, që përmban historinë e një jete. Është një takim që e kam dashur shumë. Për mua do të jetë një ballafaqim “romantik”. Vetëm dy gjëra më trishtojnë. E para: stadiumi pa tifozë është një goditje në zemër. E dyta: le të shpresojmë që si kundërshtarë të mos futemi në dhomën e zhveshjes së Interit…”
Për ca kohë, Zlatan Ibrahimovic ishte një sugjerim tregu për “Brianza”, kur e ardhmja e tij te kuqezinjtë dukej në dyshim të fortë. Galliani sqaron: “Ne kemi biseduar shumë herë, ruajmë një marrëdhënie fantastike. Ibrahimovic ishte një ëndërr, po të kishte thënë po… Shpresoj ta takoj të shtunën. E telefonoj shpesh, sapo më dëgjon, thotë fjalët e para: Përshëndetje bos, je i pagabueshëm”.
Galliani ka shumë kujtime me kampionin suedez. Me njërin prej tyre qesh edhe sot, dhjetë vite më vonë: “Ai sapo kishte nënshkruar dhe të gjithë shkuam për të festuar në darkë. Doa të paguaja, por karta ime e kreditit, pasi u provua 2-3 herë, nuk funksionoi. Në këtë situatë pagoi Ibra, por unë e ngushëllova: Mos u shqetëso, paga do të funksionojë gjithmonë. Plasën të qeshura të çmendura”.