Nëse dilema e madhe është Leo Messi dhe e ardhmja e tij, realiteti i Barcelona-s është i lidhur me projektin për të kursyer sa më shumë të jetë e mundur.
Përtej shumave që mund të fitohen me klauzolat për prishjen e parakohshmë të kontratës, largimet e kërkuara nga klubi dhe të miratuara nga Koeman, kanë filluar t’i japin që tani pak oksigjen arkave blaugrana.
Lamtumirat e Rakitic dhe Arthur, plus ajo e Vidal, që pritet të vijë shumë shpejt, do ta bëjnë klubin të kursejë 40 milionë euro për sezonin e ardhshëm.
Siç shkruan SportMediaset, nëse llogarisë i shtohen edhe kursimet që mund të vijnë nga largimet e mundshme të Messi-t dhe Suarez, atëherë flitet për një kursim 120 milionë euro.
Një rezultat shumë i mirë në aspektin ekonomik, po në atë teknik? Koeman deri tani ka treguar se nuk është shumë i lidhur me ekipin aktual të Barçës.
Siguritë e pakta kanë lidhje me mesfushën, që do të komandohet nga Pjanic dhe De Jong. Ndërsa në sulm do të jetë blerja e re Trincao.
Pjesën tjetër të skuadrës do ta zbulojmë në momentin që Barcelona do të fillojë të blejë.