E gjithë vëmendja e merkatos së futbollit është te lamtumira e bujshme e Leo Messi-t nga Barcelona dhe për një transferim të mundshëm të tijin në Itali tek Inter-i.
Megjithatë, zikaltrit nuk janë të vetmit që po lëvizin në merkato. Në Serinë A është edhe Juventus që po punon për sezonin e ri dhe të gjithë po presin me padurim për të parë Andrea Pirlo-n në rolin e trajnerit.
Në pritje të prezantimit zyrtar të Arthur, bardhezinjtë po punojnë për të siguruar një tjetër mesfushor. Bëhet fjalë për lojtarin e Sassuolo-s dhe ish-yllin e Milan-it, Manuel Locatelli.
Një ide që pëlqehet shumë edhe nga lojtari, duke parë deklaratat që ka bërë për bardhezinjtë:
“Për sa më takon, Pirlo është idhulli im, dhe është një ëndërr për mua të përmendem për një transferim tek Juventus-i”.
22-vjeçar ka siguruar se nuk bëhet fjalë për një hakmarrje ndaj Milan-it: “Nuk kam asnjë peng, jam i kënaqur për revanshin që kam marrë me Sassuolo-n”, ka thënë Locatelli.
“Duket se gjërat duhet të shkonin kështu dhe i jam mirënjohës klubit që më ka ndihmuar të rritem duke më dhënë besim”.