Sulmuesi 25-vjeçar senegalez Keita Balde rikthehet të luajë në Serinë A, këtë herë me ekipin e Sampdoria, pas dy sezonesh në Francë me Monaco. Por debutimi i tij me fanellën e skuadrës së Sampdoria është shtyrë. Shkak është bërë koronavirus.
Lojtari ka kryer vizitat mjekësore, që kanë dalë mjaft mirë, por nuk ka dhënë të njëjtin rezultat tamponi, që e ka nxjerrë sulmuesin pozitiv me Covid-19. Për pasojë, ai nuk mund të luajë këtë fundjavë dhe është vendosur menjëherë në izolim.
Klubi i Sampdoria sqaron: “Vizitat mjekësore nuk evidentuan asnjë problem, por gjatë zbatimit të normave anti-covid rezultoi se lojtari ishte lehtësisht pozitiv. Ai ndodhet në izolim dhe nuk ka patur asnjë kontakt me pjesën tjetër të skuadrës”.
