Manchester City ka mundur 3-1 Porto-n në kavën e parë të Grupit C të Champions League.
Ndeshja e luajtur në Etihad Stadium nuk ka nisur mirë për skuadrën e Pep Guardiola-s, që ka kaluar në disavantazh pas 14 minutave lojë pas një goli të mrekullueshëm të Luis Diaz.
Gjithsesi, reagimi i anglezëve ka qenë pothuajse i menjëhershëm me Aguero-n që ka barazuar ndeshjen me penallti në minutën e 21-të. Përmbysja ka ardhur në pjesën e dytë, kur Gundogan ka kaluar në avantazh Qytetarët me një goditje dënimi magjike para se Torres të fiksonte shifrat në 3-1 në minutën e 73-të.
Në krye të grupit bashkë me City-n është edhe Olympiacos, që mbrëmjen e sotme ka mundur 1-0 Marseille falë një goli të Koka-s në minutën e 91-të.