Uilliam Melo është një nga lojtarët që ka munguar në këtë periudhë në seancat stërvitore te Partizani dhe aktualisht po përgatitet i diferencuar në palestër.
Shkak është bërë një virozë e stinës që ka kapur brazilianin dhe duke ditur se jetojmë në epokën e “COVID-19”, gjendja fillestare i ka trembur disi “demat”. Për t’i bërë parapritë çdo situate jo të këndshme, klubi e ka izoluar lojtarin dhe i ka kryer tamponët për të hequr merakun e Koronavirusit.
Përgjigjet kanë dalë negative duke konfirmuar se ka qenë thjesht një virozë e stinës. Gjendja e brazilianit tani është stabël dhe shumë shpejt pritet të bashkohet me grupin për të qenë gati për fillimin e sezonit të ri. Melo dje u përgatit i veçuar nga grupi, në sallë force, por edhe më herët ka pasur probleme fizike, duke kaluar nga shqetësimi në shqetësim.