E mbani mend Amarildo Zelën? Ish-mesfushori i Partizanit, Tiranës dhe Kombëtares shqiptare, është bërë protagonist absolut në suksesin e klubit SG Vaidhofen. 48-vjeçari jeton prej vitesh në Austri, ndërsa prej korrikut 2020 është vendosur në drejtimin e skuadrës së Ligës së Tretë austriake, SG Vaidhofen. Pas 7 ndeshjesh në kampionat, skuadra e drejtuar nga Zela ka arritur po kaq fitore, duke grumbulluar pikët e plota dhe kryesuar renditjen i shkëputur me 6 pikë nga vendi i dytë.
Në ndeshjen e fundit ndaj St. Georgen, që përfundoi 3-2 për ekipin e trajnerit shqiptar, ka qenë një festë e paparë në dhomat e zhveshjes.
“Panorama Sport” ka siguruar një video ku lojtarët e SG Vaidhofen festojnë me birra në dhomat e zhveshjes, ndërsa mes tyre është edhe Zela.
SG Vaidhofen është skuadra e shtatë që ish-mesfushori i lindur në Tiranë drejton në karrierën e deritanishme si trajner në Austri.
Pas suksesit në drejtimin e disa ekipeve në Ligën e Tretë austriake, tashmë Zela kërkon të bëj karrierë në nivele më të larta.
