Tenisti 23-vjeçar gjerman Alexander Zverev, aktualisht numri 7 në botë, ka përfunduar nën akuza nga ish e dashura e tij Olya Sharypova. Në një postim në “Instagram”, ajo ka akuzuar tenistin gjerman se e ka goditur dhe keqtrajtuar disa herë gjatë kohës që kanë qenë të lidhur.
“Një ditë, në US Open 2019, kur u ktheva në shtëpi, debatuam ashpër pasi isha vonë. Ai u përpoq të më mbyste me një jastëk. U përpoqa disa herë të largohesha nga hoteli, por ai nuk më lejoi. Në fund arrita të ikja. Por kjo s’ka qenë hera e vetme që ai ka vënë dorë mbi mua”, tha Sharypova.
“Ai ishte rasti më i keq, pasi më përplasi kokën në mur dhe kisha frikë mos më vriste. Tani ai duhet të marrë përsipër të gjitha përgjegjësitë për aktet e dhunës“, tha ish e dashura e Zverev. Tenisti gjerman së shpejti do të bëhet baba, pasi pret një fëmijë nga lidhja me Brenda Patea.
