Shtatë pikë në katër ndeshjet e para të kampionatit. Është ky totali i pamjaftueshëm i pikëve i mbledhur nga Interi i Antonio Kontes në këtë fillim sezoni të Serisë A, që është edhe starti më i dobët i karrierës së trajnerit leçez, meqenëse me Juventusin regjistroi 8 pikë në sezonin 2011-’12, 12 në 2012-’13 dhe 10 në 2013-’14; ndërkohë që kishte mbledhur 10 me Çelsin në sezonin e parë 2016-’17 dhe 9 gjithmonë me blutë sezonin pasardhës; përveçse 12 me Interin në edicionin 2019-’20.
Duke parë edhe statistikën e golave të pësuar, mund të dallohet që në asnjërën prej eksperiencave të mëparshme një skuadër e tij kishte pësuar 8 pas 4 javëve të para.
Një ecuri anormale, nëse krahasohet me atë të 8 ndeshjeve të fundit zyrtare të vitit të kaluar, kur Handanoviç, mes kampionatit dhe Ligës së Europës, kishte mbajtur të paprekur portën në 6 raste.
