“Këta kampionë të mëdhenj ndihen mbi gjithçka”. Kjo u deklarua nga Vincenzo Spadafora, ministër për politikat rinore dhe sportin në Itali, duke e vijuar polemikën në distancë me Cristiano Ronaldon, kampionin portugez të Juventusit, që po lufton me Covid-19, por është asimptomatik. “Kur shkoi në ekipin kombëtar, ai shkeli protokollin, aq sa u hap një dosje në Prokurorinë Publike të Torinos, pas raportit të ASL, i cili gjithashtu do të kërkojë hapjen e një dosjeje sportive. Kampionët duhet të jenë shembuj. A ishte i zemëruar edhe presidenti Agnelli? Unë do t’iu thosha presidentëve që të shikojnë brenda klubeve të tyre për të mbrojtur industrinë e futbollit”, – tha Spadafora.
Më tej, ai u ndal edhe te fitorja 3-0 në tavolinë e bardhezinjve kundër Napolit: “Nëse një gjykatës ka vendosur në këtë mënyrë, unë e respektoj vendimin e tij. Ka ankesa në këtë drejtim dhe unë do të ftoja De Luca të kujdeset për sistemin shëndetësor të Campania, i cili pas rizgjedhjes së tij nuk ka bërë shumë… Protokolli është pranuar nga Liga dhe nga ekipet, ne nuk mund ta ndryshojmë atë çdo herë për të mbrojtur Juven ose Napolin.
Infeksionet e shumta në Serie A? Nuk e di nëse kampionati do të jetë në gjendje të shkojë deri në fund, ne nuk kemi asnjë siguri këtë vit. Edhe Liga duhet të jetë gjithashtu e vetëdijshme për këtë, ndaj duhet të mendojë për një plan B dhe C.
Më shumë sesa një pozicion kundër ministrit Speranza, unë duhej të mbroja një botë, për të cilën isha pikë referimi, – saktëson Spadafora në lidhje me vendimin për të mos e ndaluar sportin, pavarësisht nga rritja e infeksioneve në javët e fundit. – Do të isha i pari që do të doja mbylljen e sportit, nëse të dhënat e diktojnë këtë, por nuk më pëlqente që sporti të ishte i vetmi që të mbyllej”.
