U skualifikuan, por nuk iu ndanë zakonit. Bardheblutë u treguan tejet të rregullt në mbyllje të ndeshjes, duke i pastruar vetë dhomat e zhveshjes.
Gjithçka e lanë ashtu si e gjetën, pa asnjë letër apo shishe të hedhur në tokë. Ky gjest është i gjithi për t’u përshëndetur dhe sidomos në kohë pandemie, ku higjiena është kthyer në kryefjalë. Edhe pse kanë qenë më shumë se të mërzitur, futbollistët e Tiranës kanë lënë gjithçka në rregull në stadiumin “Wankdorf”.
Njësoj vepruan edhe pasi luajtën me Dinamon e Tbilisit. Kryeqytetasit i eliminuan gjeorgjianët, por kjo s’i pengoi mediat vendëse që t’i bënin jehonë veprës së tyre.
