Vitin tjetër, makina Ferrari do të pilotohet nga piloti monogask Charles Leclerc dhe spanjolli Carlos Sainz. Ky i fundit do të zërë vendin e Sebastian vettel, që do të kalojë tek Aston Martin. Drejtori sportiv i Ferrarit, Mattia Binotto, duke folur për dyshen e re të “kokëkuqes”, u shpreh optimist për të ardhmen.
“Charles është një pilot që entuziazmon si tifozët ashtu edhe ne që punojmë me të. Këtë gjë ai e transmeton te skuadra. Carlos do të vijë vitin tjetër, por e shoh si një lider, një pilot që punon shumë dhe bashkon inxhinierët. I ri, por ka shumë vite në Formula 1. Unë e doja shumë këtë dyshe dhe mendoj se pilotët janë problemi ynë më i vogël”, tha Binotto.
Duke folur për largimin e Vettel, shefi i “kokëkuqes” shtoi: “Para se ta merrja në telefon e kam përsëritur me veten 3 herë atë që do t’i thoja. Nuk ishte zgjedhje e lehtë, pasi e duam shumë si pilot, për atë që ka qenë dhe që dha te Ferrari. Nuk është e lehtë të bësh zgjedhje të tilla. Vettel është një person i respektueshëm”.
