Ish-futbollisti i Mançester Junajtid Patris Evra kritikoi me ironi futbollistin e Lids Junajtid dhe Maqedonisë e Veriut Ezgjan Alioskin për goditjen që mori në kokë nga lojtari i Arsenalit Nikolas Pepe.
Francezi e komplimentoi Alioskin për paraqitjen në fushë kundër “Topçinjve”, por e kritikoi për simulimin në minutën e 52-të. Evra nuk la pa kritikuar edhe Nikolas Pepen duke e konsideruar si “budallallëk” gjestin e tij.
“Alioski meriton një Oskar. Luajti shumë mirë. Po të isha trajneri i Lidsit do të gëzohesha shumë, por ju lutem, shikojeni. Duket sikur Pepe i theu hundën. Megjithatë, gjesti i Pepes ishte një budallallëk. Kur nuk luan shumë dhe trajneri të aktivizon, nuk duhet të ankohesh se përse nuk luan takimin e radhës”, u shpreh Evra në studion “Sky Sports”.