Kampion bote dhe fitues i Champions League në 2014-ën, por tani pa asnjë mundësi për të luajtur, të paktën tek Juventus.
Sami Khedira po kalon një moment të vështirë. Mesfushori gjerman, edhe për shkak të disa problemeve fizike, nuk ka arritur kurrë të bindë me fanellën bardhezi dhe tani ka ardhur në një pikë moskthimi me Zonjën e Vjetër, që i ka bërë të qartë se nuk e do më.
Gjermani, nga ana e tij, nuk ka pranuar të largohet. Të paktën deri tani.
Në fakt, siç ka bërë të ditur Bild, diçka ka ndryshuar në mendjen e futbollistit që tani duket se është i gatshëm të pranonte një skuadër tjetër, ndoshta që në janar.
Por, në mënyrë që lamtumira të realizohet, duhet plotësuar një kush: klubi që do të dojë ta marrë, do të duhet të jetë europian sepse Khedira nuk ka ndërmend të largohet nga futbolli i rëndësishëm.