Veç kampionatit shqiptar të futbollit, sot janë zhvilluar edhe ndeshjet e javës së 16-të në Maqedoninë e Veriut. Në fushë zbritën 4 ekipe shqiptare, por vetëm Shkëndija mori fitore.
Skuadra e drejtuar nga Ernest Gjoka mundi 2-0 Belasicën me golat e Bejtulait dhe Ibraimit. Shkupi ka barazuar ndaj Vardarit, ndërsa as Struga nuk arriti të fitojë, teksa u ndal në barazim pa gola ndaj Sileksit në transfertë.
Renova nuk arriti t’i bëjë ballë Rabotnickit dhe u mund me shifrat 3-1 në transfertë.
Shkëndija kryeson renditjen me 36 pikë, katër më shumë se Shkupi ndjekës. Struga renditet e pesta në kuotën e 22 pikëve, ndërsa Renova është në vendin e nëntë, duke rrezikuar ende rënien në kategori.
