Diego Costa kërkoi ndërprerjen e bashkëpunimit me Atletico Madrid dhe drejtuesit e “Colchoneros” e pranuan kërkesën e sulmuesit. Fakti që ndodhet në vitin e fundit të kontratës ndikoi, teksa 32-vjeçari ka dalë një lojtar i lirë dhe mund të zgjedhë vetë ekipin e radhës në karrierë.
Një ngjarje që surprizoi tifozët e ekipit që kryeson kampionatin spanjoll të futbollit. Diego Costa theksoi se po e bën këtë veprim për shkaqe familjare, por e vërteta është ndryshe. Atë e zbulon De La Morena, gazetari i El Transistor.
Ky i fundit deklaron se sulmuesi i njohur ka pasur një sherr me Nelson Vives, ndihmësin e Diego Simeones. Situata është tensionuar, ofendimet nuk kanë munguar dhe palët kanë qenë shumë afër përdorimit të duarve ndaj njëri-tjetrit.
Një gjë e tillë ka sjellë fundin e aventurës së lojtarit me Atletico Madrid, që ka piketuar Arkadiusz Milik si pasuesin e tij. Akordi me bomberin polak është arritur, ndërsa tani duhet gjetur gjuha e përbashkët me klubin e Napolit.
