Për momentin, rekordi i futbollistit më të vjetër, që ka luajtur një ndeshje në Serie A, mbahet nga Marco Ballotta, i cili luajti në Genoa-Lazio në moshën 44 vjeç dhe 38 ditë. Për ta kapërcyer atë, Buffon-it (aktualisht i dyti në renditje) do t’i duhet një sezon tjetër. Rinovimi me bardhezinjtë konsiderohet një formalitet i thjeshtë.
Ish-portieri, ndër të tjerët i Lazio, foli për mundësinë e humbjes së rekordit të tij, si në Serie A, ashtu edhe në Champions, duke bërë shaka për ambicien e kolegut bardhezi: “Ju fituat gjithçka, na lini diçka edhe neve, njerëzve të varfër! Asgjë, egoist deri në fund… Nejse, do të ishte mirë të më tejkalonte një nga portierët më të mirë të historisë”.
Ballotta më pas shpjegoi sekretin e jetëgjatësisë së Buffon, që ka të bëjë me menaxhimin ndryshe të trupit: “Gigi është në kushtet më të mira, ideale për të menaxhuar fizikun dhe ndeshjet. Nëse luani 10 ndeshje në vit, mund të përgatiteni për më të mirën tuaj. Unë kam luajtur 40 ndeshje vitin e fundit të karrierës. Do të kisha vazhduar edhe një vit tjetër, nëse do ta kisha gjetur marrëveshjen me Lotito”.
