Lionel Mesi mori kartonin e parë të kuq në karrierë me fanellën e Barcelonës në 753 ndeshje të luajtura, por grushti që i dha kundërshtarit pas koke mund të rrezikojë shumë. Numri 10 i katalanasve e humbi toruan në fundin e sfidës duke goditur Vijalibren pas një dueli mes tyre. VAR e fiksoi këtë moment dhe Gil Manzano i tregoi kartonin e kuq. Por kjo nuk është më e keqja sepse kapiteni i katalanasve mund të përjashtohet për 4 ndeshje të cilat janë të vlefshme për La Ligën apo Kupën e Mbretit. Nëse Barcelona do të kualifikohet kundër Kornejas në Kupë, atëherë ndeshjet që do të humbasë janë dy në kampionat dhe 2 në Kupë.
Barcelona’s Argentinian forward Lionel Messi checks on Athletic Bilbao’s Spanish forward Asier Villalibre (BOTTOM) during the Spanish Super Cup final football match between FC Barcelona and Athletic Club Bilbao at La Cartuja stadium in Seville on January 17, 2021. (Photo by CRISTINA QUICLER / AFP)
Ky ishte kartoni i parë i kuq i Mesit me Barcelonën. Ai kishte marrë më parë me Argjentinën, por kurrë si lojtar katalanas. Sipas rregullores veprimi i tij konsiderohet dhunë ndaj kundërshtarit dhe sipas rregullores, rrezikon të pezullohet 4 ndeshje.
“Të sulmosh një futbollist, qoftë edhe pa e dëmtuar atë konsiderohet si akt dhune dhe është i ndëshkueshëm dhe penalizohet me 4 deri në 12 ndeshje pezullim nga aktiviteti. Nëse ky veprim ndodh në një ndeshje të Superkupës së Spanjës, atëherë dënimi do të shlyhet me mosprezencë në fushën e lojës apo në stol në ndeshjet pasardhëse të kompeticioneve të tjera në Spanjë”, shkruhet në rregullore.
Si të mos mjaftojë humbja e finales, tani Barcelona duhet të mendojë për pezullimin e kapitenit, i cili është një lojtar shumë i rëndësishëm për formacionin e Ronald Kumanit. Mesi duket sikur kishte gjetur rrugën pozitive, por ky karton rihap sërish polemikat për të.
