Marselo dhe Isko kanë qenë prej kohësh në qendër të kritikave të tifozëve të Realit dhe të mediave spanjolle për ecurinë e tyre me skuadrën e Zidanit, por duket sikur me eliminimin nga Kupa e Mbretit e mbyllën aventurën e tyre me këtë skuadër. Kamerat e “El Chiringuito”-s kanë kapur momentin kur dy lojtarët kanë shkëmbyer batuta dhe kanë qeshur me njëri-tjetrin në një situatë që, në fakt, nuk ishte aspak për humor dhe ekipi i Realit po rrëshqiste drejt greminës.
Ata të dy janë senatorët e këtij klubi dhe duhet që të merrnin përsipër fatet e skuadrës, por nuk ia dolën që të ndryshonin ndeshjen dhe dështuan si gjithë të tjerët. Marselo gjithashtu ka akuzuar Viniciusin në momentin e golit të pësuar, por në fakt të gjithë ishin të papërqendruar në ato momente.
