Ish-futbollisti i Tiranës, Shaqir Tafa ka firmosur me ekipin e Serisë C në Itali, Piaçencën. Klubi konfirmoi afrimin me parametër zero të ish-mbrojtësit të Shpresave.
Tafa u mor nga Sikula Leoncio në gusht të vitit të kaluar. Edhe pse u konsiderua afrim i bujshëm te kampionët në fuqi të Shqipërisë, tarifa e madhe që bardheblutë duhej të paguanin për formimin e Tafës bëri që në nëntor palët të mbyllnin bashkëpunimin mes tyre.
Shaqir Tafa u aktivizua vetëm në miqësore me Tiranën, ndërsa nuk arriti të debutonte në ndeshje zyrtare. Ai është nën kontratë me Piaçencën deri në qershor të këtij viti.
Njoftimi i klubit të Piaçencës
Klubi i Piaçencës njofton se ka regjistruar deri në 30 qershor 2021, mbrojtësin italo-shqiptar të lindur në vitin 1998, Shaqir Tafa.
